• امراة برج الجدي - الطموحة الواقعية


  • امراة برج الجدي - الطموحة الواقعية

    امراة برج الجدي
    امراة برج الجدي

    طموحة، مستقلة، واقعية، وشخصية قوية، بتحارب الصعاب وتتخطى كل الحواجز عشان توصل لهدفها وتحقق طموحاتها واحلامها، هي: انثى الجدي…
    دايما غيرها بيحسدها على قوة شخصيتها واصرارها ومهاراتها في القيادة وتفوقها العلمي والعملي او الشخصي، جد جدا تقدر تواجه اي احباط او مشكلة، لونها المفضل من درجات البني ويوم حظها السبت اما بقى الحجر المفضل عندها فهو الكهرمان.
    لما تشوف انثى الجدي حتعرفها من أول نظرة، هي السيدة او الفتاة ذات المظهر العملي والشخصية القوية، حتعرفها من هدومها الفورمال وطريقتها العملية الواضحة سواء كان في الشغل او في البيت او حتى في قاعة الدرس، وحتعرف انثى الجدي من علامات تانية كمان حنذكرها كلها بالتفصيل في الموضوع ده..تعالوا نتعرف على اهم الصفات اللي بتميز امرأة برج الجدي 22 ديسمبر – 20 يناير.



    مين هي انثى الجدي؟

    تركيبة جذابة:
    تقليدية ومنظمة وقد المسئولية، وعلى قد ما هي جد وعملية, تحت المظهر المتحفظ ده هي دمها خفيف جدا وعندها حس دعابة عالي، بتسمع حلو وبتركز في مشكلات وفضفضة غيرها ودايما نصايحها مفيدة وفي مكانها ونادرا ما تطلع سر برة ولو حصل بيبقى صدفة ومن غير قصد.



    الحب المدروس:
    انثى الجدي عملية ما تحبش تضيع وقتها في علاقات مش واضحة الملامح ولا تجري ورا الاعجاب والحب من اول نظرة، بتاخد الحب بجدية شديدة, وبتؤمن بيه, هي ببساطة بتشوف الموضوع من جميع جوانبه ولما يبان الاول من الاخر وتطمن لحكمها ومستقبل علاقة الحب دي بتقع في الحب لشوشتها.

    الموساواة:
    مهما كانت بتحب ومهما كانت واقعة لشوشتها, انثى الجدي عمرها ما بتدي الفرصة لشريك حياتها انه يتحكم فيها، هي بتتعامل معاه من منطلق المساواة التامة في السلطة والاوامر والقرارات والماديات وكل جوانب الحياة، لو حست بالحب والامان والاستقرار مع شوية نجاح وحبة تجديد يبقى شريكها وصل للخلطة السرية اللي حتخلية يعيش مع انثى الجدي في جنة.

    الصديقة النصوحة:
    انثى الجدي دايما عندها شلتها الخاصة اللي بتميزها شوية قيود وقواعد خاصة بيها، وهي وفيه جدا لمجموعة الاصدقاء دول وصعب تتخلى عن اصحابها او تعلقها بيهم يقل، وبالرغم من كل الجدية والصرامة اللي في طبيعتها اللي بتخلي ناس كتير يتهيألهم انها ممكن تنعزل عن الناس او سهل ان تعلقها بيهم يقل الا ان صحابها الحقيقين عارفين ان ده مش حقيقي وعارفين قد ايه هي وفية ومتمسكة بصداقتهم، اما بقى علاقتها باصدقائها فانثى الجدي بتقوم بدور الأم النصوحة بكفاءة تامة دايما تلاقيها بتفكر في مشكلات صحابها وحياتهم وتحضر لهم نصايح وخطط لحياتهم ساعات كتير بتفاجئهم من اهتمامها ومن وجهة نظرها المختلفة عن التوقعات.

    مديرة درجة أولى:
    دكتورة، ناظرة ، معلمة، سياسية، موظفة في بنك، مديرة، معمارية، سيدة أعمال، او ربة منزل محترفة، كلها اعمال تليق اوي على انثى الجدي لأنها مثال للعملية والتنظيم والوضوح، ادارية هايلة، حطها قدام المسئولية الادارية لأي عمل وخليك واثق من انها حتديره بإمتياز، اهم حاجة ان وهي بتقوم بعملها تكون حاسة بالأمان والاستقرار وان بيئة العمل اللي هي بتشتغل فيها بيئة مستقرة ومنظمة، لو وفرتلها البيئة دي وحطيتها في المكان الصح اضمن ان عملك حيوصل لقمة نجاحة.

    تأمين المستقبل أولا: “الست الواعية :) “
    من اكتر الصفات الواضحة في شخصيتها حب الادخار، دايما انثى الجدي بتبص للمستقبل وتحب تفكر في الايام اللي حتطلع فيها على المعاش، تحب تأمن مستقبلها وتحس بالأمان المادي وان هي متغطية ماديا لفترات طويلة، ومع ذلك هي مش بخيلة بالعكس هي تحب تصرف بس بتحب تصرفها في الحاجات اللي بتحبها وبتصرف بكرم طالما متطمنة ان معاها في البنك فلوس تغطيها لفترة طويلة.

    فورمال وشيك:
    استايل انثى الجدي فورمال وكلاسيك تحب تلبس البدلة والتايير والجاكيت بس اللمسات الأنثوية زي الجزم الكلاسيك اللي بكعب عالي مع الاكسسوارات الأنيقة والشنطة العملية والشيك حاجات لا غنى عنها في اكتمال مظهرها، لها استايلها الخاص كده مش بتجري ورا التقاليع وعروض الازياء بس دايما انيقة وهدومها مكوية وشيك ولايقة على بعضها، ملابس جد وعملية ومريحة وانيقة تركيبة مختلفة زي تركيبة شخصيتها بالظبط.
    انثى الجدي من الشخصيات المميزة جدا, ومن الصعب أنك تلاقيها أو تقنعها بحبك… بس لو قدرت تعمل كده وتلمس قلبها.. تأكد إنك هتعيش حياة أقل حاجة تتقال عنها إنها ساحرة…


    خريطة الموقعFacebook twitter