امراة برج الحمل - المحاربة الشغوفة

امراة برج الحمل
امراة برج الحمل

المتحمسة، الشغوفة، إيجابية ومتفائلة، هدفها ديما إنها تبقي رقم واحد في كل حاجة هي بتعملها سواء كانت الحاجة مهمة زي مشروع شغل او بسيطة زي ميعاد عشا، هي: انثى الحمل…
انثى الحمل جذابة عندها كاريزما قوية قوي، وعندها حيوية وحماس واضحين في شخصيتها، دايما بتدور لنفسها على هدف وتحدي حتى لو كان نجاحها في تعلم هواية او مهارة جديدة مش شرط يكون في موضوع مهم، الحمل برج عنصره النار اللون المتحكم فيه الأحمر اما الحجر اللي بيرمز له فهو الالماظ، هي قد كلامها وابعد ما يكون عن الشخص اللي بيتكلم من غير افعال ولو اتكلمنا عن سلبياتها حنلاقي انها عنيدة واحيانا صدامية وبتزهق بسرعة مش دايما بتكمل الحاجات اللي بتبدأها.
تعالي معانا اتعرفي على صفات وملامح انثى الحمل من 21 مارس – 19 أبريل





مين هي انثى الحمل؟!

يا الحب الحقيقي يا بلاش!
انثى الحمل مليانة طاقة ومشاعر وطول الوقت بتدور على الحب الحقيقي، ولو حصل وصادفته استحالة حبيبها يقدر يقاوم سحرها وشخصيتها الجذابة، لأنها لما بتقع في الحب الحقيقي بتبقى حساسة جدا ومتفهمه وعاطفية، ولما بتحبـ بجد الدنيا حواليها بتبقة كلها الوان وسحر وبتعيش في حالة ساحرة من الحب والسعادة وعشان كده هي بتحتاج لمحب يقدر يحافظ على الحالة دي كتير مش شرط بكلام ومشاعر لكن ممكن بشخصيته الساحرة وطريقته الجذابة واسلوبه اللي بيعبر لها به عن مشاعره وعلامات الحب القوية لأنه لو مش كده حتبدأ تحس ان مش هو ده الحب اللي هي بتدور عليه وان مش ده الشخص المناسب لها.



رومانسية وتحب إنك تغير عليها:
انثى الحمل لما تقع فالحب بتحب تعيش حالة من الرومانسية وبتبقي مشاعرها فياضة قوي, و علي الرغم من قوتها الواضحة بس هي من جوه ومع حبيبها بتبقي ضعيفة, متبحش تحس إنه مالكها بس في نفس الوقت بتنبسط لما تحس إنه بيغيرعليها وبتفرح قوي بالمشاعر ده من ناحيته, وبتاخد ده دليل انه حاسس بقيمتها وفي نفس الوقت هي أوقات كتير بتغير عليه وده بيبقى نابع من شعورها بالضعف زي ماقلنا بس مع أول اشارة من حبيبها إنها هي كل حياته وانه مش شايف حد غيرها, ده بينسيها شعورها بالغيرة على طول وبترجعلها ثقتها في نفسها تاني.

التحدي والشجاعة مع كتير من التفاؤل:
التلات صفات دول هما اللي بيتحكموا تماما في انثى الحمل بعني مثلا لو قولنا التحدي حنلاقي ان انثى الحمل بتحط نفسها في مواقف احيانا بتكون صعبة لمجرد التحدي زي انها تتحمل مسئوليات اكترمن طاقتها بدافع التحدي وبتيجي على نفسها عشان تنجز المهام دي حتى لو دي حاجة مرهقة او صعبة، واثناء ده بتكون مليانة بالحماس والتفاؤل دايما انثى الحمل بتدخل على اي مشروع وهي متحمسه له جدا، وكل اللي هي بتفكر فيه اواي تكون رقم واحد، اما بقى الجزء الخاص بالتفاؤل فده ملازم لشخصيتها طول الوقت عشان انثى الحمل مليانة بالتفاؤل في اغلب المواقف دايما تحب تشوف الجانب الكويس والمشرق من اي موقف، اكيد زي كل الناس بتتعرض لفترات الاكتئاب والزعل لكن عشان طبيعتها دي بتتخطى المواقف دي بسرعة وبيرجع التفاؤل اللي ماليها يتحكم فيها مرة تانية ويخليها تخرج من الحالة دي بسرعة.

صحاب كتير وصديقات قليلين:
انثى الحمل بتحب تجرب حاجات كتير وتدخل في مشروعات كتير ومتحبش تستقر في مكان او في مشروع واحد فترة طويلة وده بيخلي عندها صداقات كتير جدا ودايما دايرة اصحابها واسعة قوي، لكن لو قربت منها شوية حتلاقي اصدقائها المقربين معدودين جدا وبتعرفهم من فترة طويلة، وده لأن انثى الحمل تحب تحافظ على اصدقائها المقربين وعلى علاقتها بيهم بعيد عن الصداقات العابرة الاخرى اللي بتمر في حياتها، ومع ذلك فهي تحب الخروجات الكبيرة واللمة والاصدقاء والتسلية اما وقت الشدة ووقت الجد فهي بتلجأ للصديقات المقربات.

قيادية ومتفوقة بس ملولة:
سيدة أعمال او طبيبة او محامية ، دايما انثى الحمل تتفوق في نوعيات الشغل اللي كلها تحدي واللي بتتميز بأنها متغيرة ومش ماشية على وتيرة واحدة وده عشان العيب الكبير اللي في شخصية الحمل هي أنها ملولة بتزهق بسرعة وغالبا بتسيب المشروعات في نصها او قبل ما تنتهي منها، عشان كده الوظائف المكتبية والاعمال الروتينية بتخليها متضايقة جدا وحاسة انها محبوسة عشان مش بتعرف تثبت نفسها فيها ولا تلاقي التحدي اللي هي بتدور عليها واسوأ ما في الواظائف دي انها بتعمل نفس العمل كل يوم وده حيخليها تمل بسرعة وتزهق من وظيفتها.

اصرف ما في الجيب:
انثى الحمل مش مبذرة بس هي من النوع اللي بيحب يستمتع بالفلوس اللي معاه وتحب تصرفها في الحاجات اللي بتمتعها وتبسطها اكتر ما تحوشها وده بيخليها تكره الادخار لأنه بيحسسها ان الفلوس بعيدة عن ايديها وانها مش قادرة تصرفها وقت ما تحب وزي ما تحب، وتحب جدا تفك ازمات الناس واكتر اللحظات الممتعة بالنسبة لها انها تسلف حد في وقت شدة او ضيقة، اما بقى شعار القرش الابيض ينفع في اليوم الاسود فده اخر شعار هي بتؤمن به لكنها مؤمنة اكتر بالمثل اللي بيقول اصرف ما في الجيب يأتيك ما في الغيب.

كله في كفة واسرتها في كفة:
معروف عن انثى الحمل أنها شخصية دفاعية.. دايما لما تؤمن بشخص او بقضية بتدافع عنها باستماتة، ويا ويل اللي يقرب من حد من اسرتها ويضايقة باللفظ او بالفعل لأنه ساعتها حيندم على الغلطة دي بسبب انثى الحمل لأنها مش حتهدى غير لما تجيب حق الشخص اللي يخصها ده بالكامل، اما بقى طبعها كأم فهي مختلفة جدا بتحب تخلي لنفسها اسلوب معين كده في تربية اولادها مش زي المتعارف عليها بس بتنجح في ده جدا و بتفرح وتنبسط قوي لما تشوف ولادها اقويا ومستقلين.

لصداع مشكلة ازلية:
اكتر الامراض او المشاكل الصحية اللي تواجه انثى الحمل هي شعورها بالصداع اكتر من غيرها وده لأن الرأس هي العضو الرئيسي اللي بيتحكم فيها وعشان كده كمان حتلاقي ان كل انفعلاتها وتعبيراتها باينة على وشها يعني مثلا حتلاقي وشها يحمر جدا لو اتحرجت او اتضايقت او خافت، اما بقى المشكلة التانية اللي بتواجهها فهي انها مش بتركز في اكلها خالص وساعات بتحاول تلتزم بالاكل الصحي والرياضة بس ده مش بيستمر كتير لأنها بترجع تاني ماتلتزمش وبتاكل اي اكل تحبه خصوصا المشروبات المسكرة والشيكولاتة والحلويات.

كاجوال او سبورتيف مالهومش تالت:
بالرغم من ان انثى الحمل بتعشق التقاليع والموضة المترقعة والافكار المجنونة الا انها بتعشق حاجة اسمها اللبس الرياضي او الكاجوال، يعني مثلا حتلاقيها تستنى اخر موديل شنطة او نضارة شمس بفارغ الصبر عشان تشتريها وتفرجها لصديقاتها بس حتزهق منها بسرعة بعد فترة قليلة يعني حتلاقي دولابها مليان هدوم وشنط واكسسوارات من موضات كتير بس مش حتلاقيها بتلبسهم كلها لأنها في الاخر بترجع تلبس الكاجوال والسبورتيف اللي بيميزوا شخصيتها عن اي حد تاني، اما بقى لو ركزنا في الالوان حنلاقي الاحمر والاسود ماليين الدولاب وما يمنعش شوية هدوم باللون الابيض كمان.

زي ما قلنا أن شخصية انثى الحمل بتعيش حياتها بقلبها وروحها, معندهاش انصاف حلول, ممكن تبان مركبة ومليانة تناقضات الا انها في الحقيقة شخصية واضحة الملامح وسهل تعاشرها وتتعامل معاها بس بشرط واحد وهو انك تحبها بجد ولازم تعاملها على إنها أول وأهم حاجة في دنيتك كلها وكمان تملالها حياتها اثارة وحماسة..


خريطة الموقعFacebook twitter