رجل برج الأسد القائد الواثق
رجل برج الاسد
قائد بالفطرة, شخصية مغناطيسية بيجذب الناس ليه. سهل جدا إنك تميزة من بين الناس بحماسته وصوته العالي, منطلق, واثق في نفسه, إيجابي وكله طاقة… عن رجل برج الأسد طبعا بنتكلم!
رجل طموح ولما بيحط هدف في دماغه مش بيهدي ولا يرتاحله بال اللي لما يحققه, حماسته بلا حدود, كريم, وفي ,شريف وشهم.
تعالوا نتعرف على مواصفات برج الأسد من 23 يوليو – 22 أغسطس.
سحره لا يقاوم:
رجل برج الأسد هو رجل رومانسي من الدرجة الاولي, كل حاجة فيه بتشد, ثقته بنفسه شديدة الجاذبية, حركاته جريئة, وسحره لا يقاوم… الناس بتحبه وبتنجذبله كحبيب وكصديق كمان. هو بيحب انه ينال أكبر قدر من الإهتمام من الناس اللي حواليه, وانه يبقي محور تركيزهم وكلامهم وبينجح بمنتهي البساطة إنه يحقق ده بجاذبيته وشخصيتة الأثره.
حبه دراماتيكي:
رجل الأسد لما بيوقع في الحب, بيقع بكل جوارحه, حبه عميق وكله دراما, كل لحظة رومانسية بتبقي مع الرجل الأسد مختلفة, بتبقي اقوي واحساسها عميق وجارف, هو رجل بيعرف إزاي يسعد شريكته, مخلص جدا وبيكرسلها حياته, وبيخاف عليها من الهوا الطاير, وبيبقي مستعد انه يحميها وبمنتهي الشراسة لو حس إن حد ممكن يضايقها أو يؤذيها. هو كمان رجل غيور جدا.
الشريكة المناسبة للرجل الأسد هي لازم تكون على قدر المساواة معاه في القوة, الثقة, الكرم, الدفء والرومانسية.. هي لازم تكون شخص جدير بهيبه الأسد…
عنيد:
رجل الأسد اوقات كتيرة بيبقي عنيد, متعنت ومتشبث برأيه في موقف معينة, صعب قوي انه ممكن يقتنع بوجهه نظر غير بتاعته أو حتي انه يسمع للطرف التاني.. ولو حد حاول يضغط عليه عشان يقنعه بوجهه نظره ممكن وقتها الأسد يطلع المخالب بتاعته.. أحسن طريقة تنفع معاه المسايسة والتلميحات الخفيفة اللي من تحت لتحت.. متحاوليش تروضي الأسد عشان مش هتقدري, حاولي تتجنبي المواجهة المباشرة وبدالها جربي معاه المعاملة الرقيقة الحنينة..
طيب القلب:
على الرغم من إن رجل الأسد ممكن يبان انه مغرور أو أناني, بس هو من جواه وللناس القريبة منه على العكس تماما, هو رجل قلبه طيب وحنين مع اصحابه وعيلته, بيقدر يستحوذ على احترامهم وحبهم ليه, حتي في شغله بيقدر بسهولة جدا ينال اعجاب واحترام زمايله, مديرينه وحتي فريق عمله, الكل بيسعي انه يكون معاه أو قريب منه, ولانه رجل مبدع بيبقي كل يوم ممكن اللي حواليه يقضوه معاه فيه جديد وغير روتيني على الاطلاق.
بيحب يعيش حياة الرفاهية
رجل برج الأسد بتلاقيه مهووس بالعربيات الغالية والاجهزه الالكترونية الحديثة, بيحب يعيش حياة مرفهة ومرتاحة, مش بيهتم انه يحوش فلوس لوقت العوزة, ممكن يقلق أو يفكر في موضوع الفلوس ده احيانا من وقت للتاني لكن مش كتير.
كريم ومتسامح
رجل الأسد اصدقائة كتير, هو بيحب أجواء المرح والحماس والإثارة, علي طول عنده اسعتداد انه يديهم رأيه في مشاكلهم, بيحب اصحابه جدا وبيبقي عايز يساعدهم, هو كريم للغاية وبيهتم بالناس اللي حواليه. زي ما اتكلمنا قبل كده عن طيبة قلب الرجل ده, هو عنده قدرة انه يسامح اللي بيغلط فيه لو حس إن الشخص ده غلط من غير قصد ومكنش متعمد انه يؤذيه.
نشيط بشكل مفرط
بما إن رجل الأسد بيحب أجواء المرح هتلاقيه دايما مشترك في نشاطات جسدية كتيرة, ممكن بشكل مفرط أكتر من طاقتة, ده بيخليه عرضة للاصابة, وبرده من المثير للإهتمام إن الرجل ده بيحب ينام ويرتاح بإفراط برده زي النشاط بظبط, عشان كده هتلاقيه بيتحول من حالة الأسد الكسلان لحالة النشاط المكثف وبعدين يرجع تاني.
الثقة مفتاح نجاحة
الثقة الطبيعية اللي في رجل الأسد بتخلي مفيش مهنة ابعد من قدراته, هو يقدر ينجح في أي وظيفة يختارتها, بيقدر يحفز ويحمس الموظفين بتوعه انهم يشتغلوا بكل طاقة وشغف. معظم اختياراته بتبقي في مجال السياسة, العمل الاجتماعي, الرياضة, المبيعات, وطبعا مجال الفنون بكل انواعه, الرجل ده يعشق انه يبقي في دايره الضوء ومركز الأهتمام, تفتكروا هل فيه حاجة أكتر من العمل الفني ممكن يديله ده؟
رجل الأسد رومانسي, كريم وقلبه طيب, يا بخت اللي شريكها الأسد, هيعيشها حياة كلها اثارة, مرح, نشاط وشغف, وفوق كل ده حب ودفء وحنان..لازم تكوني قوية عشان هو مش هيعجبه غير كده بس عمرك أبدًا ماتكوني قوية عليه هو…